இந்தியா, இலங்கை இடையிலான முதல் டெஸ்ட் போட்டி காலை 9:30 மணிக்கு மொஹாலியில் துவங்கவுள்ளது.
இந்த முதல் டெஸ்ட் போட்டி கோலியின் 100ஆவது டெஸ்ட் போட்டியாகும். இரண்டு வருடங்களாகச் சதம் அடிக்காமல் இருந்து வரும் இவர், இந்த 100ஆவது டெஸ்டில் சதமடித்து, விமர்சனங்களுக்கு முற்றுப்புள்ளி வைக்க வேண்டிய கட்டாயத்தில் இருக்கிறார். இலங்கை அணியில் அனுபவமில்லா பௌலர்கள் அதிகம் இருப்பதால், அதற்கு வாய்ப்பு பிரகாசமாக இருப்பதாக கிரிக்கெட் விமர்சகர்கள் கருதுகிறார்கள்.
கோலி பேட்டி:
இந்நிலையில் இந்த 100ஆவது டெஸ்ட் போட்டி குறித்து விராட் கோலி பேசியுள்ளார். அதில், “உண்மையை சொல்ல வேண்டும் என்றால், இந்திய அணிக்காக 100ஆவது டெஸ்டில் விளையாடுவேன் என கனவில்கூட நினைத்தது இல்லை. நிறைய போட்டிகளில் விளையாடும் அளவுக்கு, கடவுளின் ஆசீர்வாதம் எனக்கு எப்போதும் இருக்கிறது. 100 டெஸ்ட்களில் விளையாடும் அளவுக்கு எனது உடற் தகுதியை பேணி பாதுகாத்து வந்துள்ளேன்” எனக் கூறினார்.
மேலும் பேசிய அவர், “இது எனக்கும், எனது குடும்பத்திற்கும், எனது பயிற்சியாளருக்கும் பெருமையான தருணம். பயிற்சியாளர் என்னை நினைத்து பெருமைப்பட்டார். எப்போதுமே அதிக ரன்கள் அடிக்க வேண்டும் என்ற குறிகோளோடு இருப்பேன். முதல்தரப் போட்டிகளில் பங்கேற்பதற்கு முன்பே 7 முறை இரட்டை சதம் அடித்திருக்கிறேன். அணிக்கு வெற்றியைப் பெற்றுத்தர வேண்டும். 2 புள்ளிகளை பெற்றுத்தர வேண்டும் என்பதுதான் 100ஆவது டெஸ்டில் எனது நோக்கமாக இருக்கும். குறிப்பாக முதல் இன்னிங்ஸில் அதிக ரன்களை அடிக்க முயற்சி செய்வேன்” எனக் கூறினார்.
“ரன்கள் அடிப்பது எனக்கு கொண்டாட்டமாக இருக்கும். டெஸ்ட் கிரிக்கெட்தான், நாம் யார்? எந்தளவுக்கு சிறந்த பேட்ஸ்மேன்? என்பதை வெளிக்காட்டும். இதற்காகவே டெஸ்ட் கிரிக்கெட் இன்னும் நீண்ட காலம் இருக்க வேண்டும் என ஆசைப்படுகிறேன்” எனத் தெரிவித்தார்.
இந்த முதல் டெஸ்ட் போட்டி இலங்கை அணிக்கு 300ஆவது டெஸ்ட் போட்டி என்பது குறிப்பிடத்தக்கது.
