இந்தியா, இலங்கை இடையில் இரண்டு போட்டிகள் கொண்ட டெஸ்ட் தொடர் நடைபெற்று வருகிறது. முதல் போட்டி கடந்த மார்ச் 4-8 வரை மொஹாலியில் நடைபெற்றது. இதில் முழு ஆதிக்கம் செலுத்திய இந்திய அணி இன்னிங்ஸ் மற்றும் 222 ரன்கள் வித்தியாசத்தில் அபார வெற்றியைப் பெற்றது.
இப்போட்டியில் ரவீந்திர ஜடேஜா 175 ரன்களும், (4,5) ஒன்பது விக்கெட்களையும் கைப்பற்றி அசத்தினார். அதேபோல், ரவிச்சந்திரன் அஸ்வினும் (2,4) 6 விக்கெட்களை கைப்பற்றி, ஆட்டத்தில் பெரும் தாக்கத்தை ஏற்படுத்தியிருந்தார். மேலும், கபில் தேவ் (434 விக்கெட்கள்) சாதனையை முறியடித்து, இந்தியாவுக்காக டெஸ்டில் அதிக விக்கெட்களை கைப்பற்றியோர் பட்டியலில் 436 விக்கெட்களுடன் இரண்டாவது இடத்தை பிடித்தார். முதலிடத்தில் அனில் கும்ளே (619 விக்கெட்கள்) இருக்கிறார்.
ரோஹித் புகழாரம்:
இதனைத் தொடர்ந்து முதல் டெஸ்ட் குறித்து பத்திரிகையாளர்களை சந்தித்த ரோஹித் ஷர்மா, அஸ்வினை தாறுமாறாகப் புகழ்ந்து தள்ளினார். ‘’இந்திய அணிக்காக அஸ்வின் நீண்ட காலமாக விளையாடி வருகிறார். பல போட்டிகளில் வெற்றியைப் பெற்றுக்கொடுத்துள்ளார். என்னைப் பொறுத்தவரையில் அஸ்வின் ‘ஆல்-டைம் கிரேட் பிளேயர்’. அவர் உண்மையில் சிறந்த வீரர்தான். பலரும் அவர் குறித்து மாறுபட்ட கருத்துகளைக் கொண்டிருக்கலாம். ஆனால், என்னைப் பொறுத்தவரை அவர்தான் சிறந்த வீரர்’’ எனக் கூறினார்.
லதிப் விமர்சனம்:
ரோஹித் ஷர்மாவின் இந்த பாராட்டு, ஏற்றுக்கொள்ள முடியாதது என பாகிஸ்தான் முன்னாள் வீரர் ரஷித் லதிப் விமர்சனம் செய்துள்ளார். அதில், ‘’அஸ்வின் எடுத்த 436 விக்கெட்களில் 306 விக்கெட்கள் இந்தியாவில் எடுத்தது. மீதமுள்ள 70 விக்கெட்களை மட்டுமே வெளிநாட்டு மண்ணில் எடுத்துள்ளார். சொந்த மண்ணைப் பொறுத்தவரை அவரை சிறந்த வீரர் எனக் கூறி கொள்ளுங்கள்’’ எனக் கூறினார்.
‘‘ஆனால், அனைத்து நாடுகளில் சிறப்பாக செயல்பட்டவர் எனக் கூறாதீர்கள். அனில் கும்ளே, ரவீந்திர ஜடேஜா போன்றவர்கள் அயல்நாட்டிலும் சிறப்பாக சோபித்திருக்கிறார்கள். அஸ்வின் அங்கு சிறந்த வீரர் கிடையாது. ரோஹித் வாய் தவறி கூறியிருப்பார் என நினைக்கிறேன். அஸ்வினை குஷிப்படுத்த வேண்டும் என்பதற்காக அப்படி பேசியிருப்பார். ரோஹித்தின் கருத்தை ஒருபோதும் ஏற்றுக்கொள்ள முடியாது’’ எனத் தெரிவித்தார்.
