கூல் கேப்டன் மகேந்திரசிங் தோனி டெஸ்ட் அணிக் கேப்டன் பதவியை ராஜினாமா செய்த பிறகு, அந்த இடத்திற்கு வந்த ஆக்ரோஷச கேப்டன் விராட் கோலி, தன்னைப் போல் ஆக்ரோஷமானவர்களுக்கு, அதிரடி வீரர்களுக்கும்தான் அணியில் முன்னுரிமை கொடுத்ததாக தொடர்ந்து கூறப்பட்டு வருகிறது.
அபாரமான செயல்பாடு:
இவர் அணிக்குள் வந்தப் பிறகு தனது அதிரடி பேட்டிங், ஸ்டெம்பிற்கு பின்னால் நின்று பௌலர்களை உற்சாகப்படுத்தும் வகையில் பேசுவது, பேட்ஸ்மேனை சீண்டுவது போன்ற விஷயங்களிலும் மிகச்சிறப்பாகச் செயல்பட்டார். இதனால், கோலிக்கு இவரை மிகவும் பிடித்துவிட்டது. இந்த காரணத்தினால் மட்டும் அவர் அணியில் நிரந்த இடம் பிடிக்கவில்லை. தனது அபார, அதிரடி பேட்டிங் மூலமாக பலமுறை மேட்ச் வின்னராக இருந்திருக்கிறார்.
குறிப்பாக ஸ்பின்னர்கள், இன்றுவரை இவருக்கு எதிராக பந்துவீசவே தொடை நடுங்குவார்கள். அந்த அளவுக்கு காட்டுத்தனமாக அடிக்க கூடியவர்தான் இவர். குறிப்பாக, 2020-2021ஆம் ஆண்டில் நடைபெற்ற ஆஸ்திரேலிய அணிக்கு எதிரான டெஸ்ட் தொடரில் நாதன் லைனை, தொடர்ந்து அச்சுறுத்தி ரன் மழை பொழிந்து, தொடரைக் கைப்பற்ற முக்கிய காரணமாக இருந்தார்.
விமர்சனம்:
அந்த 2020-21ஆம் ஆண்டில் மட்டும் 11 டெஸ்ட் இன்னிங்ஸ்களில் 60.44 சராசரியுடன், 544 ரன்களை குவித்து சிறந்த பார்மில் இருந்தார். அதன்பிறகுதான், அவரது பார்ம் மெல்ல மோசமாக மாறத் துவங்கியது. ஆம், 2021-ல் 9 டெஸ்ட் இன்னிங்ஸ்களில் 21.22 சராசரியுடன் வெறும் 191 ரன்கள் மட்டுமே சேர்த்தார். இதனால், ரிஷப் பந்தை டெஸ்ட் அணியிலிருந்து நீக்க வேண்டும் என பரவலாகக் கோரிக்கைகள் முன்வைக்கப்பட்டது.
இந்நிலையில் 2021-2022ஆம் ஆண்டில் மீண்டும் பார்முக்கு திரும்ப ஆரம்பித்துள்ளார். இதுவரை மொத்தம் 9 இன்னிங்ஸ்களில் 46.37 சராசரியுடன் 371 ரன்களை சேர்த்து, தனது இடத்தை நிரந்தரமாக்கியுள்ளார்.
குறிப்பாக, கடைசியாக நடைபெற்ற இலங்கைக்கு எதிராக இரண்டாவது டெஸ்ட் போட்டியில் வெறும் 28 பந்துகளில் அரை சதம் கடந்து, டெஸ்ட் கிரிகெட்டில் அதிவேகமாக அரை சதம் அடித்த முதல் வீரர் என்ற சாதனையை படைத்துள்ளார்.
தினேஷ் கார்த்திக் பேட்டி:
இந்நிலையில், ரிஷப் பந்த் குறித்து தினேஷ் கார்த்திக் புகழ்ந்து பேசியுள்ளார். அதில், ‘‘சந்தேகமே வேண்டாம். ரிஷப் பந்த் நிச்சயம் கிரிக்கெட் உலகின் மிகச்சிறந்த வீரர்களில் ஒருவராக திகழ்வார். விக்கெட் கீப்பபிங்கிலும் முழு கவனம் செலுத்தி, அதனையும் சரி செய்தால் நிச்சயமாக தோனியைப் போன்று, கிரிக்கெட் வரலாற்றில் தனக்கென ஒரு இடத்தை பிடிப்பார். தோனி, ரிஷப் பந்த் இருவருமே இந்திய அணிக்கு கிடைத்த மிகச்சிறந்த விக்கெட் கீப்பர் பேட்ஸ்மேன்கள்’’ எனக் கூறினார்.
மேலும் பேசிய அவர், ‘‘ரிஷப் பந்தின் பேட்டிங், தொடர்ந்து மேம்பட்டுக்கொண்டே இருக்கிறது. புதுபுது முயற்சிகளை எடுத்த ரிஷப் பந்த் தயங்குவதே இல்லை. இதனால்தான், அவர் முன்னெடுக்கும் முயற்சிகளில் வெற்றிகாண முடிகிறது. அவரது பயமில்லாத ஆட்டம் விரேந்தர் சேவாக்கை நினைவுப் படுத்துகிறது. அவரால், நிச்சயம் பல வரலாறுகள் படைக்க முடியும்’’ எனத் தெரிவித்தார்.
